Waa Shabakad U BAN BAXDAY WARAR SUGAN IYO RAAD RAACA TAARIIKHDA.
Saturday, 23 September 2017

War La Xariira Doorashada " Mubaayacada" Ugaaska Tanade/Leelkase

Friday - November 13, 2015


Bariido-san Dabadeed: Waxaa ii soo gaaray warar la xariira in rag beesha ka tirsan oo meelo kala duwan ka tagay ay qaylo roor ugu baqooleen xagaa iyo Mudug-galdogob, halkaaso ujeedada safar-kooda sida la ii sheegay ay ku doonayaan iney ku soo af jaraan ibleys sharkiisa oo dhaqankii bulshada reerka waayahaan-ba maskaxdoodi ku fasaxay electronic laser inta badan u siraaday boqol faynuus illa u caqligi ka naafeeyey .. waxaa la yiri hadal sokeeye iyo hilib idaad waa la qaboojiya sidaa awgeed Rabigi aduunyada laha, suu rabay noqone rajadu waa haddi eebe raali ka noqdo murankaa is waab-waabinta mudada aloosnaa waxaa la qaba lnu iska qaboobi-doono.

Arintaan aan maanta murankeeda u af-duubanahay ee sida muuqata odayaashi la doortay illa hadda irbad dun galin-waayeen, ee sey u hadlayeen bidaarti dhagax ka noqotay, iyadoo weli kuwa leeyihiin bal noo aayara iyo kuwa Haa iyo No weli la soo indha cad-cad ee reerkow habacaas iyo go'aan la'aantaas wax la isku eegto ma ahan, sidaa daraadeed, waa ku mahadsan-yiin is-xilqaanka walaalaha halkaa u socdaalay, Waxaana qaba amase sida aan rajeynaayo inaad markasta ahaataan dad waaqici ah oo ereya-dooda tuf-leeyihiin, qotomiya soo jireenka xeerki dhaqankii reerka lagu yiqiin, oo koleyba sida aan taariikhda ku hayno maalintey il-xuntahay baa ilaah reerka u diri jiray rag goba oo ceynsha

Waxaa la yiraahdaa ninka ugu il-dheer baa dadka ugu ayaan daran, oo waxaa lagu colaadiya runta, daacada iyo xaqa. oo saas waxaan u leeyahay, illa hadda si kasta oo aan xuuraan basaasnimo u galay fitir-fitir wax u baaray ma garan wiilka Maxamuud Ugaas eeda culus u ku muteystay in dhaxalka aabihiis laga galiyo dood iyo muran oo lagu eedeeyo dhawr arimood oo aniga i qancin-weyday .. hadal in aan dadno iyo ku aan daboolno, labada dariiq baa mid uun dawga ku haboon, dab iyo qiiqna waa la kala yaqaan.

Sida la tabiyey inkasto eedeynta runta afka laga dhawray oo qiiqa maro lagu dadaayo, hadana eedaa runteeda waxaa ka mida maxaa hebel iyo hebal looga tagay iyo maxaad hebel iyo hebel u siisay xildhibaanimo, iyo hebel taladiisa lama tixgalin. markaa su'aashu waxay tahay eeda noocaasa maxamuud Ugaas ma looga dhigi-kara qodob looga hor istaago dhaxalka aabihiis haddi aysan jirin wax kale oo loo cuskado.

Teeda kale xulka xubnaha xildhibaanada la isku eedeynaayo ma maxamuud Ugaas bay gaar u ahayd oo ku tagrifalay mise odayaasha degaanka galdogob oo nin-kasta liis qoraal ah inta soo siiyey ku yiri ordaya Maxamuud Ugaas u geeya oo dabadeed dhawr liis oo is feer socda is khilaafsan laga qabtay dhawr nin oo xil-doona .. Maxamuud Ugaas Axmed sax iyo qalad key tahayba waa run inu maankiisa ka magacaabay Cabduqaadir Gaabane, laakiin inta kale oo xildhibaan ma ahayn wax ku yimid rabitaankiisa oo mid walba waa la cadeyn-kara sidu ku yimid .. teeda kale ma la is weydiiyey tirada xildhibaan ee nala siiyey sida ay beel-weynta reerka loogu qaybin-karo, waase kuma ninka si xaq ah tiradaa yar u qaybin-kara oo aan eed ka soo gaareyn .. isla markaa ma la is weydiiyey tirada quursiga xildhibaan markii horaba nala ku shaabadeeyey in la aqbalo yaa eeda ku lahaa .. anigoo waqtiga kuu dhawraya ma rabo inaan hadal tiro idin ku beer-gooyo.balse waxaan ku soo koobaya. Talo waa mar aad garan-weydo iyo mar aad gaari-weydo .. dadku xaalka jira iyo daneysiga gaarka ee xeerka loo jajabinaayo waa wada ogyihiin, waxaanse ku talinaaya in xam-xamta iyo hadal aan jirin laga xishoodo, oo xaqiirnimo iyo xaasidnimo beena waa laga fiican-yahay .. waa laga fiicanyahay in adoon waxba galabsan burush ceebed la mar-mariyo ..  xaalku yuusan noqon doonyahay waa kugu jirnaa nala jab.

Haatan iyo dan iyo hadal: wiilkaas ina Axmed Ugaas haddi wax ceeba oo intaan sheegay ka badan hadey jiraan, waxaan ahay ninka ugu horeeya ee wax ka burburiya mubaayacadiisa-doorasho oo waxaan kula dagaalami-doona diyaaradaha spy-ga bilaa darawalka, laakiin hedeysan jirin wax la taaban-karo oo arintu un meel isku qaad tahay yaan la is qodqodin lana boodin oo ciiro iyo boor lagu gelgelimaysan. yaan la is duufsan oo falar waxa ay foolaneyso la garaneyn cirka loo dirin.

Sida Alle ogyahay xayeeysiis igama aha dan gaara aan ka leeyahayna ma jirto oo waa walaahi: Maxamuud Ugaas dharaaro soo taxnaa xasuustood iyo mudada aan la joogay Xamar iyo intaan ka arkay ma ahayn shakhsi caga baruur cirka iyo dhulka walhanayey, balse waxuu ka mid ahaa odayaal-dhaqameedki mogdisho isugu yimid Ninkii ugu hal doorsanaa, ugu maamus wacnaa, ugu hadal macaana, doodiisa si xarago leh u celin-kara , waa geesi dirir-dood gali-kara . meeshana aad baa looga jeclaa oo shirarkii guurtida fadhi-yadooda shir gudoomiye isagu ka ahaa, oo xitaa boqor Burhaan waqtigaas aan weli Taajka hadda saaran loo caleemo-saarin, dhagaha faraha galiyey si dhuquc iyo dhagac dhawr jeer maseyr isla goday .. Ogowna oo la soco maxamuud Ugaas ma aha munaafaq daaha dibadiisa wax ka afuufa .. Maxamuud ma aha nooca oogada ka xariira oo mici sun waabaayo ah u aasantahay, ma aha nin luf-luf iyo hambo looga baqayo, waxuu u dhashay fariidnimo waana fool adag-yahay .. sideedaba qofka Ugaaska ama Suldaanka laga dhigaayo waxaa laga eega dhawr wax-yaabood oo kala duwan sida: Aftahanimo, caqli-salim, deeqsinimo, aqoon iyo ma yahay nin umadda aan dab kala dhex dhigeyn oo intaasba maxamuud waa leeyahay .. laakiin ogow hadaad ka cabir qaadato maxamuud sidi heerarkii leadership-nimadi Ugaas maxamed Cali Geesood iyo Ugaas Axmed Ugaas ma filaayo sida dhabta ah in lagu gaaraayo dhaqan iyo diin-ba oo noocoodi maanta somaaliya iyo xiligaan koonka isu eekeysiinaya yoom-qiyaamaha maba dhici-karto in iyagoo kale la helo


hits Hits : 4756