Ciidamada Kuuriyada Koonffureed Oo Soo Furtay Markab U Afduubnaa Bur-Cadeed Kuna Dilay 7 Burcad Ah
Friday - January 21, 2011
Ciidamada Badda Kuuriyada Koonfureed gaar ahaan kuwa kumaandooska ayaa howlgal ay ka fuliyeen Badwaynta Hindiya xoog ku soo furteen Markab ay dhowaan afduubteen kooxo Burcad-badeed Soomaali ah oo laga leeyahay dalkaas.
Saraakiisha Milateriga ee dalkaas ayaa sheegay in howlgalka uu dhacay subaxnimadii hore ee maanta,waxaana ay ku guuleysteen badbaadinta dhamaan shaqaalaha saaran markabka.
Ciidamadeena gaarka ah waxaa ay xoog kusoo furteen Markabka,intuu howlgalka socday waxaan dilnay Burcad-badeeda iyadoo aan soo badbaadinay dhamaan shaqaalihi saarna
,ayuu sheegay Afhayeen u hadlay milateriga oo lagu magacaabo Col.Lee Bung-Woo.
Sarkaal kale ayaa sheegay in 8-nin oo kamid ahaa Burcad-badeedi afduubatay Markabka ay ku dileen howlgalka,waxaana howlgalkaan uu ka dhacay meel xeebaha Soomaaliya qiyaastii 800-meyl kaga beegan Waqooyi Bari.
Ciidamada Kumaandooska ayaa soo badbaadinta Markabka u adeegsaday dooni nooca dheereeya iyo diyaarad Helicopter,waxaana saraakiisha milateriga Kuuriyada Koonfureed sheegin in khasaaro ay soo gaartay ciidanka soo furtay Markabka.
Madaxweynaha Kuuriyada Koonfureed Lee Myun-Bak ayaa dhowaan amar ku baxshay in si deg deg ah loo soo badbaadiyo Markabkaas si kasta haloo wajaho.
Markabka ayaa lagu magacaaba MV SAMHO Jewelry,waxaana saaran 21-shaqaale oo u kala dhashey wadamada Kuuriyada Koonfureed,Indonesia iyo Myanmar iyadoo 8-kamid ah ay yihin Kuuriyada Koonfureed.
Ma ahaan markii u horeysay kooxaha Burcad-badeeda xoog lagaga soo furto markab ay afduubteen,waxaana jirtay marar badan howlgalo laga sameeyey xeebaha Soomaaliya kooxaha Burcad-badeeda laga soo furtay maraakiib iyo dad ajnabi ay afduubteen.
24-kii saacadood la soo dhaafay ayaa kooxaha Burcad-badeeda waxay gacanta ku dhigeen labo markab ganacsi oo laga kala leeyahay wadamada Suuriya iyo Vietnam.
