Ninkii Labaad Ee Ururka Al-Qaacida Al-ayman Dawaahiro Oo U Baxsaday Xagaa Iyo Somaaliya
Thursday - September 15, 2011
Dalka Pakistaan ayaa sheegay in Hogaamiyaha koowaad ee shabakadda Al-Qaacida Ayman al-Dawahiri u baxsaday meel ka mid ah Dalka Soomaaliya ama wadanka Yaman, si uu uga baxsado Ciidamadda Dowlada Mareykanka oo baadi goob xoogan ugu jira inay gacanta ku dhigaan.
Laanta Sirdoonka Pakistaan ayaa shalay oo Arbaca ah, MBC News u sheegtay inay heleen xogo sheegaya in Hogaamiyaha Al-Qaacida Ayman al-Dawaahiri ka tagay Dalka Pakistaan, loona malaynayo inuu u cararay Dalalka Somaaliya iyo Yaman oo ka mida meelaha ugu xoogan ee ay Kooxda Al-qaacida ku dhuumaalaysato.
Saraakiil ka tirsan Sirdoonka Pakistaan oo diiday in Magacooda in la shaaciyo ayaa MBC u sheegay inay xogtan ka haleen rag katirsan Al-Qaacida oo lagu xiray meel la yiraahdo Quetta oo ka tirsan Dalka Pakistaan, kuwaasoo ay Sirdoonku sheegeen inay u cadeeyeen in Hogaamiyihii Al-Qaacida ee Ayman al-Dawahri aaday Dalalka Soomaaliya ama Yaman.
Warbaahinta MBC waxa kale oo ay soo xigatay Sarkaal u dhashay Mareykanka oo sheegay in Baxsashada Ayman ka dambaysay Cabsi fara-badan oo uu ka qaaday CIA-da Maraykanka oo daba gal xoogan ku hayay iyo sidoo kale Duqeymo ay la eegtaan Diyaaradaha Mareykanku dhufaysyo lagu tuhunsanaa inuu ku dhuumanayo.
Si cad umay sheegin Sirdoonka Pakistaan iyo CIA-da Maraykanku halka uu u baxsaday Hogaamiyihii Al-qaacida, hase yeeshee waxay aaminsanyihiin inuu u cararay Wadamada Somaliya iyo Yemen midkood.
Ninka Madaxda ka ah Sirdoonka Mareykanka ee CIA David Petraeus ayaa maalintii Salaasada ee doraad qaar ka mid ah Congreska Mareykanka u sheegay in awoodii Shabakadda Al-qaacida dhulka gashay, lana jabiyay, Waxaanu awood Darada Al-qaacida ku sababeeyay, inay ka dambeysay Dilkii loo gaystay Hogaamiyihii Al-Qaacida Osama Bin Laadin.
Ayman Al-dawaahiri oo horaantii sanadkan loo doortay Hogaanka Shabakada Al-qaacida ayaan la ogayn ilaa hada meel uu ku dambeeyay, inkasta oo laamaha Daba-galka ee Maraykanka iyo Pakistaan ku adkaysanayaan inuu naftiisa ula baxsaday meel uu ku badbaado
