Mucaaradka Dalka Eritrea Oo Bilaabay Dacaayado Lidi Ku Ah Xukumada Afawerki
Tuesday - January 17, 2012
Addis Ababa Macaaradka dalka Eritrea, ayaa toddobaadkan bilaabay olole dacaayad ah oo ay doonayaan in ay ku wiiqaan meeqaanka dawlada dalkaas ku leedahay aduunka, kuwaasoo taageero ka helay dawlada ay cadowga yihiin Madaxweyne Isias Afwerki.
Hogaamiyaha golaha ay ku midoobeen mucaaradka Eritrea Yuusuf Berhanu, ayaa sheegay in xukumadda isayas Afwerki ay tahay masiibo ku habsatay gobolka Geeska Afrika . Yuusuf waxa uu hadalka ku dhawaaqay mar uu maalintii shalay saaxafada kula hadlayay Magaalada Addis Abab, waxaana uu xukuumada Madaxweyne Afwerki ku eedeeyay in ay ky hawlan tahay falal degonaansho laaan laga abuurayo wadamada deriska.
"Xukumadda Asmara waxa ay guud ahaan gobolka Geeska Afrika ka abuuraysaa qalalaase. Waxaana ay faragalin ku heysaa arrimaha gudaha ee Soomaaliya, Djibouti , Sudan, ETHIOPIA iyo Yemen... Xaqiiqiyan waa masiibo," ayuu yiri Yusuf.
Xukumadda Eritrea ayaa lagu eedeeyaa in ay taageerto ururrada mucaaradka ee guud ahaan dalalka gobolka, waxeyna siisaa qalab, saanad iyo tababar .. Golaha Amaanka ee Qaramada Midoobay ayaa bishi December 2011 sare u qaaday cunaqabateyntii saarneyd Eritrea, taasoo sabab looga dhigay ficillada ka dhanka ah amaanka iyo xasiloonida gobolka ee xukumadda Isayas.
Golaha ay ku midoobeen mucaaradka Eritrea ayaa bishi hore waxa ay shirweyne ku yeesheen Magaalada Hawassa oo ah Magaalo madaxda Is-maamulka Shucuubta Koonfureed ee dalka Ethiopia . Shirweynahaas ayaa lagu dhisay maamulka golaha Mucaaradka, isla markaana lagu doortay Yuusuf Berhanu inuu noqdo hogaamiyaha golahan.