Madaafiic Xalay Lagu Asqeeysiiyey Garoonka Diyaaradaha Mogdisho

Mogadisho-Tiro Madaafiic hoobiyeyaal ah ayaa xalay lagu weeraray Garooka diyaaradaha Aadan Cadde ee magaalada Muqdisho, iyadoo qaar ka mid ah madaafiicda ay ku dhaceen xaafado ku dhow dhow garoonka.

Sida ay sheegayaan wararka ilaa afar ruux oo ay ku jireen caruur iyo haween ayaa ku dhaawacantay madaafiicda, kuwaasoo degenaa Xaafada Bangaariyada loo yaqaano ee ku teedsan garoonka meel aan ka fogeyn .. Madaafiicdan oo xalay saqdii dhexe ku soo dhacay xaafadaas ayaa cabsi iyo qal qal ku abuuray dadka ku nool xaafadaas, iyagoo hurdada kaga salalay dhawaqa madaafiicda soo dhacayay.

Ma jirto ilaa iyo hada cid sheegatay madaafiicda xalay oo aan si dhab ah loo ogeyn in gudaha garoonka inay ku dhacday iyo in kale, sidoo kale lama oga halka laga soo tuuray.

Al-Shabaab oo dagaal kula jirta ciidamada dowladda iyo AMISOM ayaa tan iyo markii ay isaga baxday Muqdisho sanadkii 2011 waxay Muqdisho ka waday weeraro u badnaa ismiidaamin oo ay la eeganeysay xarumaha dowladda, AMISOM iyo Hey’adaha.