Faaiidooyinka Laga Helo Cunista Sadex Xabo Oo Timira Maalin kasta

Sunday - May 8, 2016

In badan ayaa diraasado isdaba jooga lagu sameeyaa faaidooyinka caafimaad ee timirta, haba u badnaaadaan kuwa lagu sameeyo wadamada reer galbeedka oo si maalin-la ah u daba jooga geedkan miraha bunniga ah leh, waayo  waxa ay waxtar badan u leeyihiin ka hor taga xanuunnada ku dhaca wadnaha iyo waliba xasaasiyada, intaasi oo kaliya kuma koobna waxtarkuye 3 xabbo oo maalinta dhan aad cuntaa waxa ay leeyihiin waxtarkan hoos ku xusan!

Diraasado badan oo caafimaad oo uu geedkani leeyahay ayaa lagu ogaaday in ay timirtu tahay cuntada ugu dhamayska tiran dunida marka laga eego macdanta uu jirka bina aadamku u baahan yahay sida Iron, Zinc, Magnesium, iyo Manganese. Intaas waliba waxa usii dheer Faytamiinnada (Vitamins) A, B, B6 Iyo v-K.
Jirkaagu waxa uu u baahan yahay awood uu ku shaqeeyo maalinkii, timirtu waa qaabka ugu wacan, fudud uguna dheereeya ee aad awood dagdag ah ku heli lahayd.

Sida uu qortay barta Internetka ee Gesundheitstipp timirta waxa ku jira unugyo aad u milmi og, kuwaasi oo caawiya dheefshiidka jirka, iyada oo lagula taliyo dadka ka cawda calool istaaga, waxaana xusid mudan in isla markaana lagu daweeyo shubanka waayo waxa ay timirtu isu dheelli tirtaa qaabka ay saxaradu u soo marto xiidmaha qofka.

Faaidooyinka layaabka badan ee ay timirtu leedahay waxa kamid ah inay ka hor tagto xanuuno badan oo qofka soo waajihi kara, Allah idankii kadib, waana qaabka ugu wacan ee lagaga hor tago lafo xanuunka sida uu sheegay websiteka Gesundheitstipp.

Waxa ay ka hortagta dhiig yaraanta ayaa kamid ah dhibaatooyinka kusoo badanaya bulshooyinka sannadadan dambe, gaar ahaan wadammada aan dhaqaalaha badan lahayn, hadaba si aad uga hor tagto dhiig yaraan ku soo food saarta cun 3 xabbo oo timir ah.

Dhinaca kale waxay  kordhisaa awooda wadnaha. Wadnuhu waa halka uu qofku ka nool yahay, cadaymaha faraha badan ee laga helay timirta ayaa dhamaantood isku si u sheegaya in timirtu tahay cuntada ugu waxtarka badan wadnaha ruuxa bina aadamka ah. Sida diraasadahan lagu xusay ayaa timirtu waxa ay hoos u dhigtaa heerka Cholesterolka oo ah ka ugu wayn ee sababa xanuunnada ku dhaca jirka bina aadamka.

Waxa xusid mudan in timirta uu Allah SWT ku sheegay Quraanka suuratu Maryam isaga oo la hadlaya Maryam (( Rux oo gilgil jirrida geed timireedka waxa ay kuu daadin doonta rudab..)

Aaayadani waxa ay cadayn u tahay in timirtu ay qof umul ah ugu filan tahay cuunno iyo caafimaad oo dhan, iskaba dhaaf qof aan dhib qabin.

Ugu dambayntii waxa uu Nabi Muxammad SCW ku sheegay xadiis in Qofka cuna 7 xabo oo timir ah marka uu aroortii soo tooso aanay waxba ka tari doonin sixir iyo sun toona.

Waxaa noo soo gudbiyey: Cabdi Cawiye

Maqaalo Articles